2v 133

Auh yece macihui in timiquiz inic totlan tonahuac yez in moyolia ca amo ic mitzxiccahuaz in toteachcauh tetzauhteotl ca in momiyoitic in moquaxical itic ca oncan motlaliz ca oncan mopampatlatoz iuhquimma zan oncan tiyoltica ic quimatizque in ixquixtin macehualtin ca iquac intla itla quinemizque in tlenamacaquê in huehueintin mozauhquê tlamacazquê tlenamacaquê ca tiquimilhuiz ca tiquinnahuatiz in tlein quichihuazque ic tiquinyollaliz in ixquichcahuitl otlatocatiazque ihuan iquac in acitihui in ompa annemactilo anepantla metztli iapan xochitlalpan tonacatlalpan in oncan tepehuazquê in oncan tlatocatizque in oncan tlayecotilozque in oncan macozquê in quetzalli in chalchihuitl in tonacayotl ic tlayecoltilozque oncan cemanahuac ic tlamauhtitiezquê in teoatl tlachinolli mitl chimalli ca ye otinahuatiloc inic tic huenchihuax tohuicpa tixpan in inyolllo in imezzo in aquique mamaltin ye oc anquimacizquê _ ihuan in ixquichtlamantli ic oticnahuatiloc in totlayecoltiloca mochihuaz ca yehuatl mochi ic tiquintlaquauhnahuatiz in ixquichtin monecacahualhuan tiquincauhtiuh ma iuh xiquinnahuati in iquac oquiz in moyolia inic otimic ma tepetlacalco quitocacan in monacayo oncan oc nauhxihuitl onoz in momiyo occenca palani tlalli mocuepa in monacayo catel oncan tiquinnotzaz in motetlayecolticahuan tlenamacaque in iquac mitzquixtilizque niman topco quimilco quitiemazque in momiyo momozticpac teocalticpac quitlalizquê qualcan yeccan onoz in iquimillo in itopyo in momiyo