] motecuiononotzque motlatocanonotzque qujmoottitique in tlatolli qujtoque Quen toiezque cujx tiqujnnamjqujzque ca vei oqujchtli vei tiacauh in otomjtl atle ipan oqujttac atle ipan oconjttac çan ixqujch cavitontli in çan ixpeioctli in oconpopolo maceoalli Auh in axcan ma çan itlan toncalaqujcã ma çan tictocnjuhtican ma çan titocnjuhtlacan motolinja in maceoalli Auh njma ie ic vi in qujnamjquizque in tlaxcalteca tlatoque qujtqujque in tlaqualli in totoli in totoltetl in jztac tlaxcalli in chipaoac tlaxcalli qujmjlhujque Oanqujmjhioviltique totecujoane qujnoalnanqujlique Cana mochan Campa oanoallaque Conjtoque Titlaxcalteca oanqujmociaviltique oanmaxitico otlaltech anmaxitico in amochantzinco quauhtlaxcalla (auh in ie vecauh moteneoaia Texcalla in maceoalti mjtoaia texcalteca )