]in qujçato ommotlalico Tlacuban nec vncan motequjmaca vncã moxeloa in Pedro de Aluarado itequjppã muchiuh in vtli vallaticac tlatilulco Auh in Marques coioacan motlalito auh itequjuh muchiuh in marques auh in vtli in acachinanco vallaticac tenuchtitlan in moma marques ca vei oqujchtli in tenuchcatl vei tiacauh auh in nextlatilco anoço iliacac vel vmpa achto iaupevaco njman acitiuetzico in nonoalco in qujnvaltocaque tiacavan aiaac mjc in Mexica njman ic moteputztique in Españoles In tiacavan in acaltica tlaecoa in acalchimaleque qujmõmjna in immjuh ontzetzelivi in impan Españoles njman ic calaque Auh in Marques njman ie ic qujvallaça in invicpa tenuchca qujvaltoca in vtli in acachinãco mjecpa valmicalia auh connamjquj in Mexica