] qujmjlhuj Tla xivian ma cana anvecauhti xicmotlatlauhtilican in totecujo in teutl xiqujlhujcan ca otechalioa in motechiuhcauh Motecuçoma izcatquj mjtzalmomaqujlia ca omaxitico in jchãtzinco mexico Auh in oacito atenco qujmõpanavique acaltica qujmonvicaque in xicalanco ie no ceppa vncan oneoaq acaltica qujnvicaque in atlaca moch onmacalaquj onmacalten conacaltenque in tlatqujtl Auh in ontlaacaltemaloc njman ie ic vi ommatoctique itech onacito in jmacal itech compachoque in jmacal njmã qujnoalilhujque Ac ameoan campa anoallaque njman iuh qujnnanqujlique Ca vmpa tioallaque in Mexico oc ceppa qujnoalilhujque Acaçomo aço çan vmpa anmotlamja aço çan anqujpiquj aço çã toca anmocacaiaoa Auh in ovel yiollo macic in oiniollopachiuh Niman ic qujoaliacatzopinjque in acalli tepuztopiltica ic qujnoaltilinjque njman no quioalquetzque ecaoaztli
