A Tla xicmocaqujtican notlaçopilhoane yn tlanextli yn ocutl ynjc vel iximachoz yn izel teutl ipalnemoanj Dios ca iehoatl in teutlatolli Auh yn imiximachoca yn iztlacateteu in qujnmoteutiaque in vevetque çan no itech qujça yn melaoaca in teutlatolli Injn teutlatolli ixillantzinco itozcatlantzinco in tonantzin sancta yglesia cuecuelpachiuhtoc iuhqujnma ilhujcac teucujtlatl ilhujcac quetzaliztli teuxiujtl temaqujztli tlaçotetl ipam pouj in vellapanauja ynjc tlaçotli ynjc pialonj ynjn teutlatolli yn isqujchtin momaqujxtiznequj cenca intech monequj in iollocopa qujneltocazque iehica ca Dios itlatoltzin ca tlanestli ca ocotl In Dios tetatzin in tepiltzin in espiritu sancto qujmomaqujli qujmopialtili yn tonantzin sancta yglesia ynjc qujntlanextilia qujnmachtia yn isqujchtin ipilhoan