0 176

{f. 66r oc centlamantli inic tlaocoyaya in itlatocatequiuh, auh inic ontlamantli ynic tlaocoyaya iehoatl, in yavyutl yn oyavtlato yn cani motlalia yavyutl ytencopa. Auh niman ye eva in quauhtli yn oçelutl, auh iquac peva yn tlavcoxtimotlalia in quenin otlatoca in iquauh in iyoçeluh yn icuitlapil yn iatlapal in quenami quinamiquitiuh yn vmpa y yavc, cuix vel mochivaz cuix noço avelli, Auh y ye yquac y ye itlapoal ypan in iquac muchiva yavyutl amo cochi amo tlaqua cenca quica tlavcoyaya in iquauh yn ioçeluh yn que ye vetzin in itequiuh ca vmpa vnitztoc ça vmpa vntlacactoc çenca ic motequipachoa, ic tlavcoxtica, auh in iquac yn oalla in titlantli yn oconcac yn aço otlamaloc yn aço opuliuh in çe in altepetl yn oquicac iquac paqui iquac tlaqua iquac cochi ye quichia ym malli auh in iquac aziquivi mamalti çenca ic paq' auh in anoço vmpa oixpulivito in iquauh yn ioçeluh in icuitlapil yn iatlapal aço vmpa opulivito cenca yc tlaocoya cenca ic mutequipachoa yehoatl yc cocoya in tlatoani iehoatl ic peva in miqui in tlatoani miquiztli muchiva yc vntlamantli inic tlavcoyaya in tlatoani. {p. 250} Jnic etlamantli inic tlavcoyaya in tlatoani iehoatl in itlaçopiltzin yn amo yyel yn amo otlacaqui in amo mozcalia yn ac quipiaz in atl in tepetl in iquac omic in tlatoani yehoatl yc tlavcoyaia yehoatl yc motequipachoa in ipiltzin yn amo oquichtli yn amo quimocuitlavia in yavyutl in que nemiz yn que yez in petlapan ycpalpan intla nemiz que mocaquiz ym maçeoalli o ca yehoatl i ynic tlaocoyaya in tlatoani, yn ac quipiaz in ac quipachoz yn icuitlapil yn iyatlapal o ca ye ixquich yn inetequipachol yn tlatoani, {p. 251}