0v 86

() Iniquac in iz ceppa nonoca Oceloqualoque ipan Nahui Ocelotl in Tonatiuh auh in quiquaya chicome malinalli initonacayouh catca auh inic nenque centzon xihuitl ipan matlacpohual xihuitl ipan yepohual xihuitl ipan yenocaxtolxihuitl occe auh inic tequanqualoque matlac xihuitl ipan ye xihuitl inic popoliuhque inic tlamito auh iquac poliuh in Tonatiuh auh inin xiuhcatca ce Acatl auh inic peuhque in qualoque in cemilhuitonalli Nahui Ocelotl zan no ye inic tlamito inic popoliuhque Inin Tonatiuh nahui Ehecatl itoca iniquehi inic oppa onoca yecatocaque ipan nahui Ehecatl in Tonatiuh catca auh inic poliuhque yecatocoque Ozomatzin mocuepque inincal no in quauh moch ecatococ auh inin Tonatiuh zan no yecatococ auh in quiquaya matlactlomome cohuatl inin tonacayouh catca auh inic nenca caxtolpohual xihuitl ipan yepohual xihuitl ye no ipan nahui xihuitl inic popoliuhque zan cemilhuitl in ecatocoque nauh Ecatl ipan cemilhui tonali inic poliuhque auh inin xiuhcatca ce Tecpatl Inin Tonatiuh nahui Quiahuitl iniquehi inic etlamantli nenca nahui quiahuitl in Tonatiuh ipan auh inic poliuhque tlequiahuiloque totolme mocuepque auh no tlatlac in Tonatiuh moch tlacac inincal auh inic nenca caxtolpohual xihuitl ipan matlac xihuitl omome ¨¨¨ auh inin xiuh ce Tecpatl auh icemilhui tonali Nahui Quiahuitl inic poliuhque Inin Tonatiuh Nahui Atl itoca auh inic manca atl ompohual xihuitl on matlactli omome iniquehi inic nauhtlamantinenca ipan nahui Atl in Tonatiuh catca auh inin xiuhcatca ce Calli auh icemilhuitonalli Nahui Atl inic poliuhque (LG¨ p¨ )