In tlalticpac tlaca yn amo qujmiximachilia in Dios ca amo tlaca ipan pouj ca çan nentlaca nenqujzque ca intla tlaca intla vnca in iollo intla vnca in tlacaqujliz in itlachioalhoan Dios intech ca nazquja intech qujcujzquja in ixiamachocatzin Dios ipampa qujmitta in qujximati in tlachioalti qujmatizquja ca vmmoeztica monemitia intlachoale in teiucoianj yn amo motta in iehoatzin Dios Auh ynjn ca amo iuhquj qujchiuhque amo itech omiscujtique yn itlachioalhoan Dios ynjc qujmiximachilizquja yn inteouh yn intlatocauh yn inteiocuscatzin Dios çan tech omotlapololtique yn itlachioalhoan Dios oqujmoteutique in tletl in atl in ehecatl in tonatiuh in metztli in cicitlalti iehoãtin hi oqujnmoteutique qujtoque ca impal tinemi ca techiacana techpachoa ca tlatquj ca tlamama
