] injc teicneliz auh injc amo qualcan ieccan ipan machoia ca vncan nemauhtiloia ymacaxoia injc amo çan no iê moçomaz monenequjz ca iuh qujtoaia in aqujn qujcnelia in oconmaviçolti in oixpan conqujxti in jtzopelica in javiiaca in jtetlaocoliliz çan no iê conjnailia conjquanjlia tel amo çan nen iquac in ie atlamati in ie cuecuenoti in aoc tle ipan tlatta conmjxcaoaltia in jmâceoal ocatca oc iê qujcnoitta connemactia in qujtlamatataqujlia in jca chocatinemj elciciuhtinemj ic mjtoaia noviian chialo noviian ivicpa nentlamacho tlaocoialo âcan vel ichan in iaotl Tezcatlipuca çan jtlan conantinemj in jpetl icpal Auh in aqujn ipã tlacatia itonal ce mjqujztli mjtoaia mocujltonoz motlamachtiz intla pilli anoço çan maceoaltzintli muchi inemactia itech açia itech pachivia in maviçotl iquac in tlauellamaceoa mocnomati auh intlacamo uellamaceoa ca çan yneujian conmocaujlia qujmjtlacalhuja yn jtonal yn jquac y tla aca otlacat njman caltiaia qujtocamaca qujxicvenquaqualia in pipiltotonti intla oqujchtli otlacat ic qujnotza mjqujz anoço iaotl ceniaotl necoc iaotl chicoiaotl [fol v
