0 15

{f. 258v} Jnic. iijj. parapho ypan moteneva yn izquinti tlatequipanovaya yn i^chan çeçeyaca teteu. Mexicatl teovatzin. Jnic muchichivaya mexicalteovatzi^ yxicol, ytlema, yxiquipil ynic quimaviztiliaya diablo yoa^ yc tlapiaya ca iuhqui in tetta muchiuhticatca y^ calmecac, iuhqui in ma intlatocauh catca in teteuvatzi^tzi^ ynic novia^ yoa^ ixquich in tepilhoa^ intech vncavaloya ynic quimizcaltiz ynic quivapavaz tlatoltica ynic vel nemizque ioa^ in aço tlatocatizq^ anoço mocuiltonozq^ anoço teyacanazque tlapachozq^ muchi yevatl itequiuh catca y^ mexicalteuvatzi^ yoa^ no iehoatl tlanavatiaya y novia^ teteupa^ quimilhuiaya in tlein quichivazq^ teteuvatzitzi^ auh in anoço aca tlatlacoa muchi yevatl quimatia y^ mexico teuvatzi^ Vitznavac teuvatzin. Omacatl ide^. Jn vitznauac teuvatzi^ ça no iuhqui ynic tlamanitiaya yn iuhqui ic tlamanitiaya mexico {p. 82} teovatzi^ no iuhqui ynic tlapiaya in calmecac in queni^ vel tlacavapavaja tenonotzaja. Tepan teuvatzin. Jn tepa^ teuvatzi^ ça no iuhqui yn itlapializ catca yn iuhqui yn iuhqui yc tlapiaya in mexico teuvatzi^ iehica ca muchi iehoatl quinavatiaya in quenj^ tlapiazq^ calmecac, in quenj^ tlacazcaltiaya tlacavapavaia ça^ muchiuhqui in quichivaia ynic novia^ teteuvatzitzi^ Ometochtzin. Jn ometochtzin itequiuh catca in quinnechicoaia centzontotochti in ie mochintin aiac molcaoaia, vncan tepan icaca in patecatl iuhquin tachcauh mochioaia. nima^ ie quiq^tza in tochtecomatl v^can co^teca in macuilloctli in quilviaia tevoctli, nima^ ie quioalquistia in pa^tecatl y^ piaztli acatl vnca^ co^mana in teuoctli ipa^ ça^ matlacpoalli omej çaz çe in coio^q^ auh in o^co^ma nima^ ie ic netotilo tlaiaoaloa in ce^tzo^totochtj. nima^ ie ic vi in ivicpa in teuoctli, ce^ca moquequeça in ac iehoatl quittaz coionqui, auh in oquittaq^ in aq'n oquicuic coionqui nima^ ipan mochintin quitlalcavia ça icel quiticac in tevvctlj auh in otevtlaoanoc nima^ ie ic viviloa. {p. 83} Epcovacuacuiltzin Jn epcohoacuacuiltzin izca in itequiuh catca, in icoac ilvitl quiçaz in aço xiuhtzitzquilo in ie mochi ilhvitl mochi ipa^ tlatoaia inic tletemaloz, in ie mochi mochioaz mochi iehoatl ic tlanavatiaja ipa^ tlatoaia. Molonco teuva Jn molonco teuhoa, çan no iehoatl itequiuh catca, ipa^ tlatoaia, in copalli, in olli, in amatl, in tlilli inic moçaia in iehoatl chicvnavecatl, yoan ipa^ tlatoaia in tlemaitl y^ çollin, yoa^ ihvitl tliltic ic mopotoniaia in chicunavecatl.