] Nochpuchtzin quauhcihoatl otitlacotic otitequjt otiquauhtic otocelotic oticacocuico itlan tac in chimalli in tevevelli otimomaman oticnamjc otictlaehecalvi in tonan in Cioacoatl in qujlaztli axcan quauhpetlapan ocelopetlapan mjtzmotlalilia in totecujo Omjhijotzinqujz nochpuchtzin quauhcihoatl ma oc moiolicatzin quen qujmonequjltia in totecujo in tloque naoaque cujx nononqua cujx cececnj amechonmocneliliz in totecujo at tocontlazteoaz in omecavi piltzintli anoçe çan ixqujchtzin qujoalmonochiliz qujoalmotzatzililiz in pilhoacatzintli aço mjtzonmanjliliqujuh ma ticpopouhto ma ie ticmomactoca ma oc xoconmotlaoculnonochilito in totecujo in tloque naoaque
