] qujpaqujltia iuhqujn teaacotlaz teiizcali iehoatl injc mjtoa ca mâceoale tlacnopilhujanj ca much oncan qujçaia in iuhquj inemactia in jzqujtlamantli njcan moteneoa No iuhquj imâceoal muchioaia in cioatl mocujltonoaia momaujzçotiaia vel motitianqujanj tiamjcaqujnj teca muchioanj tepan tlaocoianj Etc auh intla aca amo iuhquj ipan mochioaia mjtoa ca ça ixcoian inêviiã conmocaujlia qujmotlaçolmjctilia in jtonal ipampa acaço uel omonotz acaçomo uel otlamâceuh in iuh ie mjieccan omjto Auh injc mjtoa cenca qualcan in tonaltzonco in jpan matlactlomej oçomatli (ioan in oc cequj ipan tonaltzontli) injc vmpa qujnjquac qujmaltiaia in tlacatia in jpan in izqujtetl tonalli omoteneuh in qujncenteteoana matlactli tochtli ipampa mjtoa qujlmach muchipa navintin vncan tlatoa iehoan tlacemjlhujtiltia qujtlatalhuja in tonaltzontli itoca Tlavizcalpan tecutli ioan citlalli icue njman ic tonatiuh ioan Tonaca tecutli iehoatl injc qujquallittaia tonalpouhque in qujtoaia ca uel vncan ca ilhujlli nemactli ioan no qujtoaia veuetioaia in aqujn vncan tlacatia qujtoaia qujtlamjz monemjtiz in tlalticpac tlamaujçoz