] Auh in çatepan in ac onaaquj in mamalti oallanavatiloc injc mjctilozque novian in inteteupan tlatlacateculo vel novian tepan jxque in mamalti Auh çatepã ie ic qualanj in Mexica qujtoque Ca njcan totlan onoc technelotoc in suchimjlcatl in ie njcan chanchiva amo nel vmpa contlalia in jtlatol Auh inin ça tiqujncaoa çan popolivi auh in ie iuhquj in ovel motzõtec njman ie ic teçaçaco in cioatzitzinti in jlamatzitzin yoã in ie tlapalivi muchintin mjmjctiloque aocac mocauhque ca iuhqujn qujmontlatolevito qujmoncujtlachivito in ovallaque in techpalevizquja xochmjlcatl in cujtlaoacatl Auh njman iquezqujlhujoc ontetl in acalli qujçaco vncan in jiauhtenco çan mjxcavico in Españoles ioatzinco in qujçaco aiaac tlacatl çan oc valmjxcavitiaque [fol r
