notlatzin Don Diego de Sn¨ Francisco tehuetzquititzin. yhuan occequintin tlaçopipiltin yno niquin caquilli ynhuel mellahuac quimatia ÿn huehue menonotzaliztli. yn nican niccuic yn intlatlotzin. ynic axcan ycni tlaneltilia nicnamictia ynin tlahtol ynoccequintin ynaquique yntleyn totoca ynachto Christianosme momachtianime yn tlacpac omoteneuhque ynhuel cencaquimatia. yniuh yeonneciz yniuh oquitecpantiaque. ynehuatl axcan niquinneltililia. niquin chicahuilia ynin tlahtol. maiuh maco. ocaye yxquich ynic tamechonpehualtilia ynticneltilia yn ticchicahua huehue tlahtolli huel Xicca quican Xicanacan yn antepilhuan yn anteyxhuihuan. ynan Mexica ynan Tenochca. yhuan ymochintin yn çaço ac yehuantin. yn amotech ± quiçatihui yn yollizque. in nemitihui yn amo tlacamecayo huan yezque. {/¨¨¨/}
____________________________________________________________
tlahtol peuhcayotl
Aqui comiença la Chronica y Antiguedad de los Mexicanos.
± {/¨¨¨/} Yzcatqui nican ompehua yn Chronica Mexicayotl ynon can quitauhca teneuhtoc ynin tecoma ynin tlacatiliz. ynhuel yehuatl ynin tzintiliz pehualiz yhuan yninhuallaliz ynimecoliz. yn yehuantin. yniçan ypanin Nueva España motenehua omotecaco yhuan oquimacehuaco ymochi ynixquich yc huey. yehuatl. auh yhuan ynicotzintic ynicopeuh yniconelhuayohuac in huey Altepetl in Mexico Tenochtitlan. ca yn toca. Mexitin chichimeca Aztlan tlaca Chicomoztoca. auh yniquac ynipan cahuitl amohuelmolnamiqui yniquin quehma.
Auh cahuel yehuantzin ytlanequilitzintica. yncenquizca huecapan. hueytzintli teuht Dios Jesu Christo. ynic yehuantin hecozque huallazque. motecaquihui. onoquihui