2r 17

Auh yn omoteneuh tlacpac yn ihcuac nican hualcallac omotocateneuh Juez Andres de S Tiago Xochitototzin xuchimilco ychan ynic nican quihualmihualli tlahtohuani Don Antonio de Mendoça Visurrey ynic tlachiaco yhuan tlatehtemoco yhuan tetlahtocatlallico yn oncan oqu excan poliuhticatca tlahtocayotl ^y nican ypan altepetl Ama^qmecan moch quitemoco yn tomacuilcantian yc ticate nican yn iuh cacatqui y Tetzonmacuiltlayacatl Altepetl ynin huel mochiuh yxquich ytzinecan ynelhuayocan yuh mellahuac neltiliztica quittitique yn iuh huel cécen ahxiliztli hecoliztli ticpia yzquican /niquihtohua tlaca çan nauhcan) yhuan quitemo mochi y ye huecauh huehuetlahtocatlacamecayotl yn iuh oncatqui huel cehcen tlahtocayotl ynic nican Tomacuilcantian Ticate Amaquemecâ huel iuh quittitique yhuan yttitiloque yn aquique huel oc yehuantin tlaçopipiltin in tlahtocapipiltin in tlahtcaoquichtlachihualtin no yhuan yttitiloque y yehuantin monetehua tlahtocacihuapiltlachihualti pipiltin yn oquinchiuhque tlahtocacihuapipiltin motenehua yn inpilhuan cihuatlachihualtin pipiltin moch quimittac yxpan nezque yn omoteneuh Juez yn iuh yehuantin catca omoteneuhque Don Thomas de S m^jn quetzalmaçatzin yhuan yteyccauh Don Juan de sandoval Tecuanxayacatzin auh yn imomextin in yn oncan macihui tlahtocatia Amaquemecan ce ytztlacoçauhcan ce tlayllotlacan Teohuacan yece yuh mihtohua ca çan incihuachan çan ipampa ^ynantzin yhuan ypampa yncitzin ^ycitzin ynic ompa tlahtocatia auh yn itechpa inttatzin cacamatzin ynic mihtohua oquichtlachihualti ca huel nican tepilhuâ tzacualtitlan Tenanco atlauhtlan mihtohua huel tenanca yn oquichtlachihualiztica auh ca çan cihuatica ynic ompa Tepilhuan Amaquemecan ynin huel mochi yuh quittitique yn omoteneuh Juez auh ya yehuatl ipampa yn ynic oncan quimilhui yn amehuantin quetzalmaçatzin yhuan Titecuanxayacatzin ca ancihuatlachihualtin yn axcan oncan antlahtocati Ama^qmecan ca amo cenca huel amochan ca çan amocihuachan yn amoncate ca ye oniquittac yc o noyollo pachiuh yn iuh catqui amotlacatiliz ca antzacualtitlan tenanca amatlauhteca yn oquichtlachihualiztica yhuâ no yehuatl ypampa ^y yniqu iuh quimilhui yn omoteneuh Juez yhcuac no yxpan moteylhui in Don hernando cortes cihua yllacatzin tlahtocapilli ye omoteneuh tlacpac huel yehuatl in ytech pouhticatca huel yaxca yn omoteneuh ytztlacoçauhcan tlahtocayotl auh macihui yn oncan î tlahtocatia omoteneuh Don Thomas de S m^jn quetzalmaçatzin ca çan iuhqui quipialiaya ytlahtocayo auh yehica ypampa yn omoteneuh Don hernâdo Cortes cihua yllacatzin ca oncan in oquichtlachihualli catca huel ytlaçopiltzin yehuatl catca yn tlahtohuani Ayoquantzin chichimeca Teuhctli yc teomeca yn iuhqui yntoca ^y ompa maltiqu in moyaomiquillito huexotzinco yn oc tlateotoquilizpan ypan xihuitl años yuh mihtohua ompa cuacualloc y huexotzinco yhuan yuh mihtohua ynin omoteneuh ynic Teomeca Ahoquantzin yn inantzin catca tlahtocacihuapilli Mexico Tenuchtitlan hualmohuicac quil ychpoch y huey tlahtohuani Axayacatzin auh yhueltiuh y huey tlahtohuani Moteuhcçumatzin xocoyotl ynic mihtohua ymachtzin yc quinotzaya temach catca yn Ayoquantzin auh yn o yuh moyaomiquillito ^y huexotzinco yn omoteneuh Tlahtohuani Ahoquantzin chichimeca teuhctli yc niman quimachiztito y huey tlahtohuani Mexico Moteuhcçomatzin yn quenin omoyaomiquillito huexotzinco yn imachtzin Ahoquantzin auh yn ihcuac yn o yuh yyollo pachiuh Moteuhcçomatzin auh ye niman y yehuatl omteneuh tlahtohuani Ahoquâtzin ^y nican quicauhtia ytlaçopiltzin yn itoca Don hernando Cortes cihua Yllacatzin macihui yn oc coçoltica onoc yc niman quihualmacac y tlahtocayotl y chichimeca teuhcyotl ytztlacoçahucan Ama^qmecan ynic mihtohua oc coçoltica onoc y cihua yllacatzin y macoc tlahtocayotl quihualmacac yTencopa mochiuh in tlacatl Moteuhcçomatzin Xocoyotl huey tlahtohuani Mexico Tenuchtitlan yn ihcuac ^y mochiuh ayemo huallacia yn españoles auh y yehuantin ytztlacoçauhque amaquemeque quicelica ynic intlahtocauh mochiuhca yn cihua yllacatzin ypan xihuitl de años yn ihcuac ^y ye yuh nepa nauhxihuitl moyaomiquillito huexotzinco yn ittatzin Ahoquantzin catca auh çan nauhxihuitl yn itech oncatca tlahtocayotl y chichimecaTeuhcyotl yn omoteneuh cihua yllacatzin yn itztlacoçauhcan auh çan quicahualtihque yn itlahtocayo ynic quicauh yn oc yehuatl quimaca ca ytlatzin Moteuhcçumatzin Xocoyotl auh ça tepan concuillito yn omoteneuh Don Thomas de S m^jn quetzalmaçatzin yn iuh niman ye onnecitiuh