0 17

Auh in Chapoltepec, oncan cacique in huehue Huitzilihuitl in yehuatl in achtopa in tlatohuani catca Huitzilihuitl ompa quihuicaque in Culhuacan ompa quimictique in Culhuaque. Auh niman ye ic on miquania in Mexica in oncan Acuezcomac, oncan quinxinque oncan quicuique in atlatl, inic axcan itocayocan Atlacuihuayan, niman ye ic huitze, on motlallico in Mazatlan ihuan in Tepetocan mochi, ic motecaque in Mexica, auh ca niman ± oncan huallaque in Culhuacan, auh yehuatl in Coxcoxtli tlatohuani in oncan Culhuacan, macihui quimachiyotitihui huehuetque Mexica yehuatl ipan in Achitometl tlatohuani in oncan Culhuacan (ye ce inehuatl Domingo de Sn¨ Anton Muñon Chimalpahinhuellonic nemilli in Mexica Xiuhtlapohuallamatl oniquittac, inipan omoteneuh tlacpac in ome acatl xihuitl 1299 años, yehuatl in Coxcoxtli tlatocati in oncan Culhuacan) niman oquimilhui in Mexica in Huitzilopochtli, notahuane xictlatlauhtican in Coxcoxtli, canin tiezque niman oquitlatlauhtique in Coxcoxtli, quilhuique tlacatle tlatohuanie, catimitz totlatlauhtilia, campa neltiazque ca onelloticmatque in Matzin in Motepetzin, maxitech motlaocolili achitzin in motlaltzin in oncan ipan tonyezque, niman oquin manquilli oquitto in Coxcoxtli cayequalli. Auh niman oquinnahuati in itlatocahuan ± in Coxcoxtli in Culhuaque quimilhuia campan yezque oquilhuique initlatocahuan tlacatle tlatohuanie ma ompa huian maye ompa yeti in Tepetitlan in nican Tizapan, niman ompa oquincahuato oquintlallito in ompa Tizaapan, auh niman oquinonotzque in tlatohuani in Coxcoxtli quilhuia tlacatle tlatohuanie caotiquincahuato in Tizaapan in Mexica, niman oquito in Coxcoxtli ca yequalli, ca amo tlaca, ca cenca tlahuelliloque azompa tlamizque Cohuaquallozque, ca cenca in chan in cocohua. Auh in yehuantin in Mexica cenca opapacque inoquimittaque in cocohua, Zan moch yehuantin in quin mopahuaxillia in quin motlehuachillia in quiqua yehuantin Mexica. Auh niman yequitohua in Coxcoxtli oquilamic yequimilhuia Culhuaquehe, in anquincahuato tlaxiquimittati, cuix ± omicque, niman oquilhuique, ca ye qualli tlacatle tlatohuanie matiquimittatin, auh in oquimonittaque tlapopotztoque, poctli mani tlatlatia, inipan onacique, niman quimilhuique, ohuanquihiyohuique Mexicaye zan tamechittaco, tamechtlapalloco, quenancate, niman oquinhualnanquillique, oquimilhuique oantech mocnellilique catipacticate quimonilhuique, caye qualli, ye tihui huallaque in tecpan niman yequininotza in Coxcoxtli yequilhuia tlacatle tlatohuanie, ca otiquimonittato ca oquintlatlamique in cocohua in oquinquaque cayocaque in cocohua caotlanque, niman oquitto in Coxcoxtli, otlaxiquimitacan catlahuelliloque maquichiuhtic{c}an, maca xiquinnotzacan. Auh in Mexica in yehuecahua yequin mocihua montia inimichpochhuan in Culhuaque in yehuantin Mexica, auh in Culhuaque yequin momontia in Mexica inintelpochhuan ye nellihui inin pilhuan. ± Auh in tlatohuani Coxcoxtli oncatca yeintin ipilhuan: inic ce itoca huehue Tezozomoctli, inic ome itoca huehue Acamapichtli, in zatepan in ompa tlatocat in Culhuacan; inic ey cihuatl amohuel momati initoca quimocihuahuati