] yntech tlamiloia in tlalloque in teilaqujliztli tlavitequjliztli ipampa yn in diablome qujmilhuj qujstiliaia yn ipan quavitleoa anoço atlcaoalo in veuetque in iquac xiuhtzitzqujloia in ipam imilhujuh tepeticpac mictiloia miequjntin pipiltzitzinti in moteneoaia tlacateteuhti in iehoantin yn ontecuezcomeque in qualli intonal no yoan temoloia patiutiloia mitoaia ca iehoantin vel tlaçonextlaoalti Injn ca cenca vey yoan cenca temamauhti tlatlaculli in qujchioaia in veuetque yn impampa diablome in tzitzitzimi in culeleti in iehoan tlaloque momotia ca iehoanti qujtemaca in qujaujtl yoan in isqujch tonacaiutl ic cenca omotlapololtique in veuetque yoan cenca oqimoiolitlacalhujque yn Dios ca çã vel izeltzin techmomaqujlia in tisqujchti cemanaoac titlaca in iehoatl qujavitl ynjc muchioa yn isqujch tonacaiutl ca iuhca in teutlatolli izcatquj Dabo vobis pluujas temporibus sujs et terra germinabit germen suum et pomis arbores replebentur Leujtici Motlatoltia in totecujo Dios qujmitalhuja Namechnomaqujliz in qujavitl in cecexiuhtica yn imonecian (intla uel anqujmonemiliztizque notenaoatil in tlacatle tlateutoqujliztli anqujchioazque) auh in tlalticpactli notencopa tlaxoaltiz tlatlaaqujllotiz auh in xochiqualquaujtl notencopa cenca moxochiquallotiz cenca tlaaqujz In amoculhoan amo qujmattiaque [fol v
