02 53

{f. 272v} Jnic xij. parrapho. ipan mjtoa yn quezquj tlamantlj, yn vncan mochivaya tlatequipanoliztlj y^ vnca^ tlacatecolocalco. Tlacazcaltiliztlj Jn teizcaltiaia tlenamacac inmac co^caoaia in tlamacazque y^ tlavitequini in tlapiani. {p. 126} Tenonotzaliztlj quinnonotzaia inic vel nemizque y^ amo maviltizque y^ amo tlatziuhtinemizque. Tlachpanaliztlj Inic tlachpanazque in teuitvalco quitzatzilia in isquich in tlamacazcatepitzin ynic tlachpanaz. Tletlaliliztlj yoan quincuitlaviltiaia ynic tletlalizque inic tlapialo, vnca^ neteteco in tletitla^. auh ça^ noviian in tletlaliloia yn teuitvalco, in tlequazco in o^ca^ tlatlaia aço matlactecpa^tli cenca miec Ioallapializtli Jn ioallapializtli iehoantin quimocuitlaviaia in tlamaceuhq^ in istlamatque intequiuh catca. Quauhçaquiliztli Jn quauhçaquiliztli inic tlapiaia in tlatlaia calmecac iehoa^ti co^cuia in tlamacazcatepitzitzi^ in ayamo ce^ca istlamati. Vitztequiliztli Jn vitztequiliztli iehoa^tin conteqz in tlamacazq^ yn aiamo ce^ca istlamati in quinontlacuisque. acxoiaçaquiliztli Jn acxoiaçaquiliztli iehoa^tin co^cuia in tlamacazq^ in ie istlamati. tlatlapitzaliztlj In tlatlapitzaliztli, iehoa^tin intequiuh catca in tlamacazcatepitzitzin yoan in ie istlamati neneliuhtivia. {p. 127} Tlilpatlaliztly Jn tlilpatlaliztli, iehoantin intequiuh catca in tlamacazcatepitzitzin in quipatlaia mochi tlacatl ic moçaia, vel moçemaquiaia inic moçaia acan mocaoaia auh in quipatlaia vncan in tlillacalco, auh in tlilpatlaloia çan ioaltica, auh in neoçaloia ycoac in tlavizcalli ehoa {p. 127}