22v 234

In temazcalli in vncan netemalo intlanel cenca totonquj intla vmpa iaz in moteneoa cocoa njma qujpouhtitlaça qujpoloa injc cenca totonquj ocatca in temazcalli intlanel çan qujiaoac onmoquetzatiuh oc cenca intla tehoan motemaz Auh injc patiz qujl nappa in vel inoma contlaçaz in conatequjz tapalcatl qujl ic amo qujpoloz injc totonquj çan oc cenca totonquj iez Ioan in vme tin tlacati in mjtoa cocoa qujlmach in canjn tlapalo in qujpa tochomjtl amo vel vmpa calaquj yntla vmpa calaqujz qujlmach qujxoxa qujpixa in tlapalli amo qualli in quiça çan mocujcujcujloa oc cenca yehoatl in chichiltic Auh injc pati achi contlapaloltia in tlapalatl qujl ic amo ytlacaviz in tochomjtl No yoan in iehoantin in mjtoa cocoa in canjn mopaoaci tamalli amono vel vmpa calaquj iehica qujlmach intla vmpa calaqujzque no qujxoxa in tamalli yoan in comjtl amo vel ycuci intlanel cemjlhujtl çan chichicoycuciz in tamalli Auh injc pati injc amo iuh muchioaz in jquac tla ocalaqujto contlatiz in comjtl Auh intlanoçe ijxpan mocontema tamalli centetl ipan contlaliaia qujl ic amo ytlacaviz in tamalli