In ac tehoatl in ticpoazin in tlatolli in tlacpac omito yn omicujlo cenca tle ticmati vel xicmati ca monahoatil muchiuhtica yn ispantzinco in Dios injc titlatoz intla ticmati intla aca qujchiuhtinemi anoço canapa muchiva yn omito tlateutoqujliztli njman tiqujspantiliz yn iusticia in sancta yglesia in teupisque yn anoço y iusticia yn audientia real in topileque oc cenca iehoantin in padreme amo çan neiolmelaoalispan vel neteilhujlizpan Auh ynjn iciuhcatiqujtoz amo ticvecaoaz amono timomauhtiz vel tiqujspantiliz in teupisquj yn iuh otiqujttac yn iuh oticcac In aqujque yntla qujmati intla oqujttaque in tlateutoqujliztli yn amo qujtoznequj yn amo qujspantiliznequj in teupisquj ca tlateutocanjme ca diablome yiauoan in totecujo Dios