Tle ticmatcatzintli tlacatle tlatoanje nopiltzintzine totecoe tlaçotitlacatle in maca çan cana panoaia ma oc xonmocxiieiecotzinotiuh ca amo ivian ieccan ca amo yvian qualcan in petlapan in jcpalpan in jmaviziocan auh in tlalticpac ca tlaalaoa ca tlapetzcavi ca aiac onqujzca ca moquatoc ca nenepanjuhtoc in tzoaztli in tlaxapuchtli in xomecatl in çacaqualli in çacamjtl ma oc ontlanto yn jioiave in totecoe ma oc ontlamj in melciciviliz Maca xoconvelicachioa maca xoconpaccachioa in cochiztli auh in nel cueitl vipilli tle iez quexqujch qualiztli ca mjqujztli ca cocoliztli ma xonmocujcujtivetzto ma xoconmamatto ma xocontetemjcto in motequjuh