Auh in Motecuçoma oc nen tlanaoatica in qujtzatzaquazque in vtli in vchpantli qujmetecaque in oallamelauhticac njcã Mexico auh ie vmpa qujmontlachieltiaia in jpan vtli iaticac calacticac tetzcucu Auh in vncan qujmetepãtzacca njman qujmatque qujttaque in çan oqujtzatzacque atle ipan conjttaque caanque veca conxoxopeuhque quioalchichitotzque veca ica ommamaiauhque in metl vncã cochque amaquemecan njmã ie ic vitze tlamelauhtivitze qujmelauhtivitze in vtli acico in cuitlaoac çan oc no vncan cochque in oqujncentlalique tlatoque in jzqujcan tlatocachioa injc chinãpaneca in Suchmjlco in cujtlaoac in mjzqujc çan ie no ivi in qujmjlhujque in juh qujmjlhujque chalcatlatoque Auh in iehoanti chinanpaneca [fol r
