] intla aca ipan otlacat izqujlhujtl oc conchololtiaia qujchieltiaia in chiconqujavitl qujnjquac caltiaia inic qujtocamacazque ipampa ic qujpâtia in jtonal vncan qujieccaquixtia ieccan qujça chicoqualtia ic conjttilia in aço ça itla ilhujl imâceoal muchioatiuh intla nemjz intla uel oapaoaz intla uel moquetzaz ipampa oc vncan in chicomatl qujtlaliaia vel qujtemachiaia in chiconqujavitl qujtoaia ca qualli tonalli icnooa teicnoittanj tetlaocolianj in aqujn vel ipan tlacatia tlacnopilhujanj muchioaia iuhqujn ipan tzetzelivi iuhqujn ipan pipixauj iuhqujn momoloca ilhujl imâceoal icnopil mjtoa ca nel iuhquj itonal in chiconqujavitl Auh in aqujn ipan tlacatia can njman iquac maltia qujtocamaca aocmo conchololtia aocmo qujtlatviltia aocmo connechcatlaça auh tel no iuhquj in jmoztlaioc qujtztica in qujtoqujlitica
