0r 1

qui]lliloque yhuan ocaltiloque oyellimiquilloque otexilliloque otequipanolloque yn ihcuac yehuantin oc moyomahtlahtalhuiaya yn oqu iuh yyoca catca yn ayamo yuh quinhualpehuaya Mexico tlahtoque ye omotocateneuhque auh yhuan nican quezquintin Teneuhtoque yn omoteneuhque ytztlacoçauhcan chichimeca teteuhctin yn chichimeca tlahtoque yhuan in yehuantin in çâ no chichimeca teteuhctin yn  ça no chichimeca tlahtoque yn oncan omotlahtocatillico omoteneuh Tecuanipan yn ipan calpoltlaxillacalli huixtoco yhuan in yehuantin yn tlamaocateteuhctin in  tlamaocatlahtoque yn oncan omotlahtocatillico ypan nauhtlayacatl Panohuayan No yhuan nican  pouhtoc Teneuhtoc in cecenyaca cecenme in tle in xihuitl in ipan motlahtocatlallique No yhuan in tle in ^y xihuitl yn ipan mo miquillique yhuan yn quecizqui xihuitl in motlahtocatillique No  yhuan nican tocateneuhtoque yn omoteneuh teuhctlahtoque motenehua Senadoresme catca yn icizquintin yn ipan omoteneuh oc oncalpoltlaxillacalli motenehua Tlacatecpan yhuan amilco ynic cececni oncan oteuhctlahtoco// yn oyeco onemico yn oquimixtlatico yn oquinnanamiquico omoteneuhque omentin in huel yehuantin tlahtoque ynic oquinauhcahuico oquipiaco ye  huecauh yn itzinecan Tzacualtitlan tenancayotl auh in ye oncan in omoteneuh occan in tlacatecpan yhuan amilco  yn ôcan hualyetihuiya omoteneuhque Teuhctlahtoque ca no yhcuac oncan polihuico in Teuhctlahtoliztli ynic techpeuh tichalca Mexica ynic oncan in huel neci motta ca yn oc ye huecauh yn  itzinecan Tzacualtitlan tenancayotl cenca hueycan catca yn axcan ye popolihuiznequi yn ipan in xihuitl de años in ça yuhqui calpoltlaxillacalli yn iuh ypan neztica auh ynin omoteneuh tenancayotl ynitzinecan yn ihcuac hecoque ahcico ca niman yhcuac occan xeliuhque yxtlapanque in tenanca ynic cequintin ompa hualmocauhtiquizque ayotzinco auh ça tepan oncan hualmicuanique in tepopolla Texocpalco ynic no oncan Tenanco mochiuh yn axcan ye motenehua S Juan baptista ynin ce altepetl yc catqui ce gouernador oncan tlapia yhuan oncan moyetzticate Teoyotica oncan motepachilhuia in tlaçoteopixque Sto Domingo auh yn oc cequintin tenananca (!) ompa hualmocauhtiaque omoteneuh atenco ayotzinco yn axcan ye ce altepetzintli yc catqui ye motenehua Sancta catalina Martyr yhuan oncan moyetzticate teoyotica oncan motepachilhuia in tlaçoteopixque S Augustî yhuan ce alcalde oncan tlapia auh ynin omoteneuh altepetzintli Ayotzinco ompa pouhtica ytech yn altepetl Tepopolla Texocpalco Tenanco ytlatititzal ytlahuillanal ySujecto mochiuhtica auh ynic occan ytlatitizal ytlahuillanal ySujecto mochiuhtica yn omoteneuh altepetl Tenanco Tepopolla Texocpalco yehuatl yn altepetzintli xuchitepec yn axcan ye motenehua Sto Domingo yhuan oncan moyetzticate Teoyotica oncan motepachilhuia in tlaçoteopixque yn itlaçopilhuantzitzinhuan omoteneuhtzino totlaçottatzin Sto Domingo yhuan ce gouernador oncan tlapia ynî Xuchitepeca no motenanca ytohua yece amo neltiliztli yehica ypampa ca oc centlamantin oc ce tlacamecayotl quipia ca inhuan pohuan inxeliuhcayohuan in ciudad xuchimilco tlaca achtopa ompa ymacehualhuan catca yn ompa otlapachoco tlahtoque ypan etlayacatl altepetl xuchimilco yn oncan motenehua Tepetenchi yhuan Tecpan yhuan ollac yuh mihtohua ynic nican huallaque yniqu imac motlallico omoteneuh altepetl Tenanco Tepopolla Texocpalco ynic oncâ quinmomacaco yn oncan tlaylotlacateteuhctin yn tlaylotlacatlahtoque yn oncan otlahtocatico yhuan no yehuantin yn ixquichtin in cenca miequintin yn onca hualmocauhtiquizque oncan quinhualcauhtiquiz in tlahtohuani Quahuitzatzin tlaylotlac teuhctli yn tlaçotlahtocapipiltin Teuhctlahtoque moch huehueyntin yn oncan hualmocauhque yn ihcuac yancuica hecoque ahcico auh yehuantin in anoço ye ynpilhuan ymixhuihuan yn oncan quincelique quinmomacehualtihque yn omoteneuhque xuchimilca in axcan ye motenehua xuchitepeca in ye o yuh motemacato intemilticahuan ymelimiccahuan inquaxochpixcahuan quinchiuhque ynic achitzin yntlal quinmacaque Tenanca ynic ompa quintecato ompa cequintin quincahuato yn inquaxochpan tlahtoque Texocpalca yn itocayocan callayoco yhuan quauhtzontzonco yhuan xuchitepec yn oncan axcan omololoque omaltepetlalique auh ynic oncan in omotlalli gouernaçiô ca çan oquintlaócollique oquimocniuhmacaque otehuelitiltihque in Tenanca Tepopolla Texocpalco tlaca ynic ça tepan virreyes oquinmotlachicahuililique yn xuchitepeca yehica in yehuantin xuchitepeca ca amo pilloque amo tlahtocayoque catca auh yn axcan ompa gouernadorti ca çan quauhpipiltin Auh ynic occan xeliuh Yxtlapâ tenancayotl ye oncan in in motenehua tzacualtitlan tenanco chiconcohuac yn axcan ye motenehua Stiago yn oncan hecoco ahcico yn omoteneuh y ye mache huel yehuatl y centlahtocauh catca yn ixquichtin omoteneuh ytoca quahuitzantzin tlaylotlac teuhctli nican achtopa ycpac Amaquemeque tepetl motlallico yn oncan moyetzticate teoyotica oncan motepachilhuia in tlaçoteopixque Sto Domingo auh ynin Tzacualtitlan tenanco chiconcohuac Amaquemecan ca inxeliuhcayohua inhuanpohuan huel oc no yehuantin Tenanca yn otecauhque nican tzacualtitlan tenanco yn ompa omololoto yn ompa omaltepetlalito omoteneuh quaxochtenco atlauhtlan yn ipan xihuitl de años yn ihcuac omochiuh congregacion auh yn ica teoyotl ytech omopouhque yn altepetl chimalhuacan in çan no yehuantzintzin ompa Teoyotica motlapachilhuia Teopixque Sto Domingo ynic cemeyehuantzintzin ompa atlauhtlan missa quimonmottitilia Tenanca atlauhteca ynic no ce alcalde oncan tlapia yece aocmo mochtin huel Tenâca yn oncan in atlauhtlan omololoco ca cequi ytztlacoçauhque yhuan cequi tlaylotlaque Teohuacâ tlaca quaxochpique yn oncan ohualmololoque yn oncan ohualmopouhque intlan yeppa atlauhteca oncan onoque inic cepan ye tlatenancatilia ahnoço ye tlaatlauhtecatilia o izquican in nauhcan quizticate yn axcan Tenanca chalca No yhuan nican tocateneuhtoq^ yn ixquichtin tlahtocatepilhuan motenehua Principes yhuan in tlahtocateychpochhuan motenehua Princesas yn inpilhuantzitzinhuan yn omoteneuhque in tlaçotlaylotlacateteuhctin in tlaçotlaylotlacatlahtoque yhuan yn atlauhteteuhctin yn atlauhtecatlahtoque yn oc yehuantin tlateotocanime motenehua gentilesma catca No yhuan nican Teneuhtoc ynic onenepaniuh ynic oneneliuh in tlahtocatlacamecayotl in tlahtocaeztli in tlahtocatlapalli ynic nican ypan macuiltlayacatl yn oncan yc macuilcan catca tlahtocayotl ye huecauh yn itztlacoçauhcan Totollimpa Amaquemecan yhuan Tecuanipan yn Panohuayan in tlaylotlacan Teohuacan yn oc tlateotoquilizpan catca yhuan yn axcan ye christianoyopan ynic omotlalli in tlahtocahuayolcayotl cihuatica yn izquicampa yn intlacamecayoc yn omoteneuhque yzquicampa tlaçotlahtoque auh oc cenca yehuantin nican tenehuallo in tzompahuacan Tecuanipan tlahtoque catca çan quezquintin yhuan Ytztlacoçauhcan tlahtoque catca yehica ca ompa yntech yyocampayxti onancaticatqui ytlacamecayo yn omoteneuh tlacatl Señor Don domingo hernandez Ayopochtzin auh yn Panohuayan yhuâ tlaylotlacan teohuacan atle ompa quipia tlahtocatlacamecayotl çan tiquincahua yn ompa tlahtoque catca amo nican tiquintlacamecayotenehua mochintin çan yehuâtin nican tenehuallo yn oneliuh yntlacamecayo mochi nican pouhtoc teneuhtoc ma yc timotlapololti yn ac tehuatl in tichristiano macamo mitztlapololtiz xicmoneltoquiti çan huel ce nelli Dios