in omitzpialti auh in cemilhuitl omilhuitl inic onimitznacaztzompotoni in ye yuhqui immimiliuhqui in huitzauhqui auh inic onitzonhuitectinemia in tzihuactli in tetehuitl auh in cemilhuitl omilhuitl immonacaztlan immoyollotlan in onompilcatinemia in nimotta in nimonan Auh inin at ye imman at ye oncan in nitlamahuiçoz in nihuehue in nilama at ye nican motlapoz in toptli in petlaacalli auh aço ye axcan in noconittaz in quenin toconhuicaz toconohtlatoctiz in tzotzopaztli immalacatl at nican cemilhuitl omilhuitl mopial ommuchihua ca no ihui i yehuatl tommuchihua auh nican xocontocti in ohtli in toco auh xoconixtlamachti no tehuatl imaquechtlan itozcatlan xoconilpi in chalchihuitl in teoxihuitl auh iyomotl inacaztlan iyollotlan ximopilo nopiltzintzine Ma motech quitta in ipampa ca in teixtlamachtiani itechtzintiz itechpehuaz in quenin ahmo ixmaizcachihuiz in itlaixtlamachtil immotoli
