] ichtaca tlapaloaia yn tlachtacayia inmanel çan tepiton oconpalo iuh mitoaia tennecujlivia tepantilviia avic momamana avic xoqujvi ynjte yoan in aca matzicoliujia yma qujcuecuetza icxi qujcuecuetza macopichauj icxicopichahuj icxicuecuechca yhixatotoco tenpapatlaca tenviviioca itech qujneoa mitoa oqujtlavelique in xoxouhque tepicme Auh yn otlathujc njman ie ic apeoalo yn apeoa çan iehoan yn ioanjolque in vel icalloc in centlaca cemeoa in vel icujtlaxcolloc yn vel imecaioc moteneoa apeoalo iquac cempoliuja tlatlami in quexqujch mocaoaia in atl in tlaqualli yoan inoc quexqujch omocauh xaiocomic in vctli in aiuctli in tlachioalvctli in iztacvctli in cochvctli Auh yn tepiqujnj in tepicquj in tlacoacivi yn iuh omito tlacpac ic patiz yoan yn aqujn atlan miqujzquja ynjc amo mic iehoatl ynjc tepiquj ynjc moxtlaoa ynjc qujneltilia yn netol Auh yn ixqujch yn innechichioal yn intlaquen yn imamanepan yn imoztopil yn intlapetlanjlquauh yn imaiauhcocul yoan yn inchalchiuhxical yoan ynjn tlaquaia molcaxtotonti quauhcaxtotonti çoqujtecontotonti muchi vmpa concaoaia tepetzinco atlan contepeoaia vmpa anepantla ytocaiocan Pantitlan
