] tlaçulteteo Auh ynjc motocaiotia tlahelquanj qujl ipampa imixpã mjtoa imjxpan mopoa yn jxqujch nequalli iixpan mjtoa momelaoa yn jxqujch tlahellachioalli immanel cenca temamauhti immanel cenca oujh atle mopinavizcaoa vel muchi iixpan neci jxpan mjtoa Neiolmelaualiztli Qujlmach in tlaçulli in teuhtli in aujlnemiliziotl iehoatl qujtemaca ic temotla ic tehipitza in in tlaçulteutl Auh çan no iehoatl qujtepolhuja iehoatl chico tlanaoac qujujca qujteca iehoatl tepapaca tehaltia iehoatl imac manj immatlalatl in toxpalatl Auh injc qujtepopolhuja ynjc chico tlanaoac qujujca qujteca iixpan neiolcujtilo iixpan neiolmelaoalo yn tlaçulteutl iixpã mopoa mjhtoa in tetlachioal Auh iix ynacaz ytlacaccauh muchioa in tlapouhquj in tlamatinj yn jmac manj yn amuxtli yn tlacujlolli in qujpia yn tlilli yn tlapalli yn matile yn piale yn nonotzale yn oqujto [fol v
