G Oc no centlamantli netlapololtiliztli ic oqujmixpupujotili in diablo in veuetque oqujntlaneltoqujti in iehoantin in mocioaquetzque qujtoaia moteucuepa qujntocaiotique Cioatetu Cioapipilti Intech tlamiloia qujlmach tetlaueliaia teca mocacaiaoaia injc aca itech qujneoaia in tlavelilocatia tennecujliuja isnecujliuja matziculiujaia icxicupichauja ixcimimiquja momacuecuetzaia tëqualacqujçaia ic mitoaia ca omotenamicti ipan oqujzque in cioapipilti in ipampa hi cenca imacaxoia neteutiloia inchachan in vmaxac imixpan tlamanaloia ilhujqujxtililoia miectlamantli ic qujntlamanjliaia yn imilhujuh ipan Injn in qujchiuhtiaque yn amoculhoan injc q'nmoteutiaia miequjntin cioa vel tetlapololti yoan teuetzqujti cenca ic omopinauhtique injn ca uel qujtlauelnamiquj yn isqujch teutlatolli