Xihuallacatla, Tzihuactla, nequametla, Zacatla, Cuillotla, inohuian in hualnentiaque in huallac xipetlatiaque, ca mazatl, tochtli, tecuani, Cohuatl, tototl, inquiminaya in quihualquatiaque imehuatilmahualyetia, ihuan tonacayotl, inin techhualmonectia inyuh ye on neciz, quihualnotztia in tleinin tlapial inin tlaquimilol qui hualhuicaya inquimoteotiaya. Auh inic hualpanoque in Aztlan in Azteca Mexitin, acico oncan in Culhuacan quin oncan quihualantiquizque in Diablo tetzahuitl Huitzilopochtli in huallaque ce cihuatl itoca Chimalma ompaqui hualhuicaque in Aztlan Chicocca hualquiztiaque inic hualenenque.
Auh in ompa ic huallehuaque Azteca in Culhuacan nahuintin ± inquihualmamaque in tetzahuitl Huitzilopochtli toncohualonotia in teomamaque ce tlacatl itoca Iztacmixcohuatzin, auh inic ome itoca Apanecatl, inic ey itoca Tetzcacohuacatl, inic nahui cihuatl itoca Chimalma yehuantinin imotenehua teomamaque.
Auh in oacico in quahuitl ytzintla, niman ye iquitzintlan oncan on motlallique in oncanicac cenca tomahuac in quauhuitl in ahuehuetl niman oncan contlallique in tlamomoztli ipan quitlallique in tetzahuitl Huitzilopochtli, inocontlallique auh in ye iquezquilhuitiyoc niman conmanilique inimitac, niman yetlaquazquia, niman ye quicaqui aquin quinnotza inicpac huallahtohua ahuehuetl quimilhuia in oncan ancateonximica nican, amo amopanhuetziz, camotztlahuetiz in ahuehuetl niman ic quicauhque in quiquaya cenca huecauh in totoloticatca niman içomiquanique Oquitlalcahuique in ahuehuetl, oneltic inotlahuic omotzineuh ininpan poztec in quahuitl in ahuehuetl, ± oncan oc nauhxiuhtique incatca Azteca Mexitin, inic oncan motlallico itzitlan mocehuiaya in ahuehuetl auh inin omoteneuh quahuitl ininpanpoztec Mexitin, zan noyehuantin intlaaquil mochiuh in Azteca inyuhquitotihui huehuetque yeyuh matlactlomome xihuitl oncan cate in Aztlan inipan 12 calli xihuitl 6l años. Iniquac caquique quahuitl in ahuehuetl yeyuhnepa yepohualli ipan ce xihuitl motlacatillitzino innelli Dios itlazopiltzin Jesu-Christo inic caquique omoteneuh quahuitl ahuehuetl inipan in 5 tecpatl xihuitl 1068 años, inoimpan poztequico in omoteneuhque Azteca Mexitin in otlipan inic huallaque, auh inic cenca huecauhtica inic icaca in ahuehuetl. inic tlaaquilli, ihuan inic poztequico, inpan Mexitin in ixquichcauhtica ontzon Xiuhtica ipan matlacpohual xiuhtica ipan ± chicuexiuhtica, inyuh neztica in tlapohual huehuetque.
Auh ye omito in quahuitl itzintla huecauhtica in ocompa catca in Azteca Zatepan in ohualpeuhque inotlica inpan oacico in tlatlatecollo huey comitl itlahuehuetztoque, ihuan cequintin mizquitl itzintlan huehuetztoque yehuantin inquintocayotia mimixcohua chicomentin in ce tlacatl itoca Xiuhneltzin, inic ome itoca Mimichtzin, inic ey in