] in iuh cemjlhujtl in oallatvic aoc tle qujtetlaneuhtia yn jmoztlaioc ic vncan vel tematlac maquia in tlacatecolotl onmjquj ca nel ie oncan ca itequjuh ca iê in qujtetemoa ca ie vncan ca ipoliujliz ca njmã iuh iiollo qujmatia in oc nemj in aço cana axioaz ca njman iuh ipan tlacat içan mjqujz njman aic avia aic vellamati itzotzoma itatapa ietinemj auh çan moxixicotinemj maçoma motlaqualçoma noviian imacaxo acan vel tepan calaquj aiac icnjuh auh in manel ie oanoc oaxioac amo ic momauhtia amo ic motzaqua amo ic qujcaquj intla oncate ipilhoã çan mochipa iuh nemj amo qujcaoaliztlamati vncan activi quitzacutiuj much iuh vi much iuh polivi çan no iuhquj itequjuh catca intla çioatl muchi amo qualli in jtequjuh catca cenca motolinjtinenca âcan ichan in manel cioapilli âcan ixtona âcan motztica can iuhquj onmjquj totoneoatiuh in jiollo mjtoa ca nel iuhquj itonal in jcnoiotl