04 151

{f. 59v col. b} Auh in aiel telpochtli, no tzacuiltilloia namoyalloia, iehica ca quitemacaia in intelpochtlaol çeçentlacol ; ioan in iuauh : can no iuhqui yn ichpochtli, no quitemacaia, ichpochtlaolli, no ioan yvauh, ycacauauh in telpochtli ce^.xx. Auh in ie muchi y, in tlaolli, in vauhtli, in cacauatl, quipiaia : y^ telpochtlato, vmpa monequia in ixpa diablo ic tlamanaia in quimanaia, ce ciacatl in tlaxcalli in tlamapictli, ioa^ yn coateq'pan : ioan y veca yauc vmpa quiquaya, in tequiuaqz. {p. 221} Jn telpopochtin, ioan yn ichpopochtin, yntequiuh catca, in coatequitl quauhquetzaia, in inchan tlatoque ; ioan in vmpa mexico, vnquauhquetzaia, ioan in otli quichichiuaia ; ioa^ in cana tetzaqualli, motecaya, ioan in cana ayauhcalli, motlaliaya : vel intequiuh catca, in cuicoyanolloia in telpopochti, in ioa^ yn ichpopochtin. Auh inic cuicoyanolloia mochichiuaya, moçaia : ça mecaaiatl in quimolloloaya, yc neçia, in quexquich veyac, maxtlatl macoya ; ioan in teucuitlatl, in intepilol : ioan in inacoch xiuhtica tlatzaqualli. Auh in tequiuaque, ic mochichiuaia, ym pilli, quetzalalpilloni, yn contlaliaya, yxiuayauh, coçauhq' in teçacatl conaquiaya : Auh in çan quauhtli, quauhtlalpilloni, in contlalia : Auh in ichpochtli mochichiuaia yancuic yn icue, ioan yn ivipil : mopotoniaya, tlapaliuitica, moxauaia, intzatzallan aactiuia in telpopochtin ynic mitotiaya, in iquac, cuicoyanolloia iquac ; in panquetzaliztli, ioan, yn tlacaxipevaliz, ioan in tecuiluitl, ioan toxcatl, ioan xocotl vetzin, ioan vei toçoztli. {p. 221}