02 17

{f. 259v} Ometochtlj patecatl, Jn ometochtli pa^tecatl iehoatl quiiollitiaia in macuiloctli imac concaoaia in toltecatl iehoatl {p. 87} quichioaia in tevoctli ipan panquetzaliztli popolivia in macuilloctli. Ometochtli napatecutli, Jn ometochtli nappatecutli ipa^ tlatoaia in copalli in amatl in olli yn ie isquich monequia in icoac miquia nappatecutli ipa^ tepeilvitl Ometochtlj papaztac, Jn ometochtli papaztac, çan no iehoatl quichioaia in octli in mitoaia tiçavctli iehoatl co^macaia in motecuçoma auh icoac tlanaoaia in ie isquich pipiltzitzinti in aço oquichtli anoço çihoatl ipa^ toçoztlj. Ometochtlj ide^. Jn ometochtli ipa^ tlatoaia in tlaqualli in ietl in xochitl, yoa^ in amatl in copalli yn ie isquich omito auh itech moneqz in ometochtli in icoac motonaltiaia ipan atl caoallo. çyuaquacuily. Jn cihoaqualli itequiuh catca in is ve^tli i^ vnca^ moneqz ate^chicalca^ in suchitl yn ietl ynic quitlamaniliaia in toci, vel isquich in vntlamanaia {p. 88} in cihoa, yn icoac naoaloa iehoatl mochi itequiuh catca in cioaquacuilli. çyuaquacuilj, iztac çiuatl. Jn cioaquacuilli iztac civatl ça^ no v^pa tlapiaia vnpa tlamocuitlaviaia in atenchicalca^, yoan ipa^ tlatoaia in tlachpanaliztli in tletlaliliztli, yoa^ in aquin o^pa monetoltiaia iehoatl conilviaia in cioacoacuilli iztac cioatl iehoatl mochi quitzo^tequia in tlein vnca^ mochioaia ate^chicalca^ Yxcoçauhquj tzomolco teuva Jn iscoçauhqui tzo^mvlco tevhoa itequiuh catca in xiuhtecuquavitl quitzatziliaia, inic mocuitiuh quauhtla, auh in co^cuia çan iehoantin in telpopochti intequiuh catca, auh yn oquicuito xiuhtecuquavitl vnpa onquetzaia yn tzonmolco calmecac. Tlaçolquacuillj Jn tlaçolquacuilli itequiuh catca vnca^ tlapiaia vncan tlamocuitlaviaia in mecatla^ in quimaquiaia ixicol iieteconton ietinemj ce^ca tlamaviçotiaia in teupan yn vnca^ {p. 89} mecatla^, aiac vnca^ mexixaia, auh in aquin vnca omaxis nima^ quitzitzquiaia quicalaquiaia y^ mecatla^ vnpa quiçoçoia. Tecpantzinco teuva. Jn tecpantzinco teuhoa vncan tlapiana tlamocuitlavjaia in tecpantzinco yoan itequiuh catca in ve^tli ipan tlatoaia quitzatziliaia inic tlamanaloz oncan tecpantzinco.