152v 290

Nican ypan in yn momiquilli in Huehue Quetzalmaçatzin Chichimeca teuhctli yn tlahtohuani Amaquêmecan yn tlahtocat caxtolli on nahui xihuitl auh yn momiquillito ompa yn itocayocan Acahualtzinco auh ye yc nauhxihuitl in yn cactoca yn tlahtocayotl yn ayac tlahtocat Amaqmecan yhuan yn Acxotlan auh macihui yn tlahtocatque yn cuezconpixque ye ce ca çan macehualtin ca çan quichtecque ÿn tlahtocâyotl auh yn oyuh quimatque yn Chollolan yhuan Quauhquechollan yhuan yn Itzocan yhuan yn Tetzcoco yhuan yn Xochmilco yn tlahtoque cenca quallanque quihtoque ma titononotzacan ypan yn Mexicatl ma ticyaomanillicân tle ay quen mochihua yn oquichololti yn Chalco tlahtoque cuix amo tonan cuix amo tota yn Chalcatl auh ynin yn intlatol ynic mononotzaya yn nohuian tlahtoque auh nimân quimatque quicacq y nican Tenochtitlan tlahtohuani yn Huitzillihuitzin yhuan yn Quatlecohuatzin Tlacochcalcatl yhuan yn Itzcohuatzîn tlacateuhctli yn iuh quitohua yn Anahuaca auh yn iuh quitohuaya yn tlahtoque yn Anahuaca yn tonan yn tota yn Chalcatl anca ço in ye huecauh mochi tlacatl nican hualmotlahtocatlalliaya y nohuian tlahtoque yn oqu ic ayamo macocuia yn ayamo mocuecuetzohuaya yn Mexica {Ipan in y IX Tochtli xihuitl años nican motlahtocatlalli yn tlacatl Huehue Yxtlilxochitzin ome tochtli yc chicuacen yn tlahtocauh mochiuh yn Aculhuaq Tetzcuca ynin ytlaçopiltzin yn Techotlallatzin Coxcoxtzin O iuh xiuitl tlacat yn ipiltzin Yxtlilxochitzin yn itoca Neçahualcoyotzin }