] tepuztli in intlavitol tepuztli in inchimal tepuztli in intopil auh in qujnmama in inmaçaoa iuhqujn tlapantli ic quaquauhtique yoan novian qujmjlivi in innacaio çanjo neci in inxaiac cenca iztac ixtetenextique tzoncoztique tel cequj tliltic in intzon viiac in intentzon no coztic tëtzõcoztique cocototztique ocolochtic auh in intlaqual iuhqujn tlacatlaqualli veitepul iztac amo etic iuhqujn tlaçolli iuhqujn ovaquavitl iuhqujn ovaquauhtextli injc aviac achi tzopelic achi nenecutic monecticticaqua motzopelicaqua auh in jmjtzcuioan veveipopul nacazcuecuelpachtique tenvivilaxpopul ixtletletique ixtletlesuchtique ixcocoztique ixtlecocoztique xillanvicoltique xillãoacaltique xillancapitztique vel quaquauhtique amo tlaca manj neneciuhtinemj nenenepilotinemj ocelocujcujltique mocujcujloque Auh in oiuh qujcac in Motecuçoma cenca momauhti iuhqujn iolmjc moioltequjpacho moiollacoma