F In tlateutocanjme amo çan centlamantli in innetlapololtiliz ca cenca miectlamantli netlapololtiliztli itech qujça itech iuli in tlateutoqujliztli in iehoantin momati ca pacticate iece vei iaujutl ipan nemi G In iehoantin in tlateutocanjme qujnmictia in inpilhoan imixpan yn inteuhoan auh cenca miectlamantli in tetlaelti in tequalanj in ioaltica qujchioa yn imixpan inteuhoa in ixqujch in intlachioal yn innemiliz muchi teuhio tlaçollo nepanotl mocuculia nepanotl momictia nepanutl motlaxima in temictiliztli yn ichtequjliztli in tetlaximaliztli in teca necacaiaoaliztli in necomonjliztli neisnamiqujliztli noviian actimotecac auh aiac qujmocujtlauja in necnelilmatiliztli in nepializtli in chipaoacanemiliztli in haujlnemiliztli in teuhtli in tlaçolli vel innemiliz in tlateuctocanjme