initoca Opochtli in Itztahuatzin, Zan huel Mexicatl, tequihua in ceme Mexica ihuan oncan mocihuahuatique Culhuacan yehuatl initoca Cohuatzontli in conan ichpoch in Acxoquauhtli tlatohuanicatca in cihuapilli conan itoca Nazohuatl) Auh niman ohualpanoque in oncan Culhuacan in Mexica oquinhualhuicaque inin cihuahuan inimichpochhuan in Culhuaque ye quinpilhuiatia in oncan ihtic altepetl in Culhuacan.
Auh inipan omoteneuh Ome Acatl xihuitl 1299 años, inipan toxiuhmolpilli iniquac oncan callaquico ipan altepetl Culhuacan in ± Mexica yeyuhnepa matlacpohualxihuitl ipan cempohuallon caxtolli ipan ce xihuitl ompa hualquizque chian Aztlan inixquich in nohuian Otlipan ohualnentiaque inic oncan motlallico Culhuacan inipan tlatohuani omoteneuh Coxcoxtli.
Auh ihuan ye yuhnepa matlacpohual xihuitl ipan cempohuallon macuilli xihuitl ompa hualquizque in zan oncan ic quizaco in quinehuayan Chicomoztoc inic nohuian ohtlipan hualentiaque, inic niman oncan ocallaquico Culhuacan oncan omotlallico inipan omoteneuh Ome acatl iquac oncan quitlallique niman in Tenochtzin in quin yacanaz Mexica, oncan quilpillique inixiuh ic macuilpa oncan quilpillitacico inin xiuh Mexica in ixquichica ompa ic hualquizque Aztlan inic cenca huecauhtica, inic hual motlatlallitiaque inic mohuian imohuipan ohualnentiaque huehuetque inic ohuacico Culhuacan.
10 Acatl xihuitl, 1307 años, ipanin momiquillico in tlacatl Coxcoxtli tlatohuani catca Culhuacan, oncan quincauhtia initic ± yaltepeuh in Mexica, yeyuh chiuhcnauh xihuitl oncan motlallico. Auh ic niman oquauhtlato in Achitometl in oncan Culhuacan.
13 Acatl xihuitl, 1323 años, ipanin oncan cempohual xiuhtique on macuiltique in Tizaapan Culhuacan in Mexica, inic oncan onoque Auh in yehuatl niman oquimilhui initahuan in Huitzilopochtli, quimilhui notahuane occe tlacatl in neciz itoca yaocihuatl, canocitzin. Auh cati quixnextizque, auh tlaxicca quican notahuane caomonican in tiezque canechca in titlamatihui in oncan titlapiezque, auh ca amo zannen in tiazque in tiquin tlacahuizque in Culhuaque, caticaco cuizque in tomiuh in tochimal, auh in axcan ximochicahuacan, Ximocencahuacan caohuanquicacque in oncan ixneciz in yaocihuatl in nocitzin, auh canamechnahuatia tlaxihuian xiquitlaniti inipiltzin inichpochin Achitometl, huel yehuatl initlazopiltzin ± anquitlanilizque ca nehuatl nicmati namechmacaz, auh niman oyahque in Mexica oquitlanito in ichpoch in Achitometl. O¨quitlatlauhtique in Mexica quilhuia nopiltzine tlacatle tlatohuanie, catimitztotlatlauhtilia in timocolhuan in timomacehualhuan, ihuan in ixquichtin in Mexica, catic momacahuilizca titech momaquiliz in mocozqui in moquetzal in mochpochtzin in toxhuiuhtzin in cihuapilli caompa motlapiellitica, in oncan in Tepetitlan Tizaapan, auh niman oquihto in Achitometl, caye qualli Mexicaye Maxic huicacan, niman oquin macac in Mexica oquihuicace in ichpoch in Achitomel caxitique ocontlallito in oncan Tizaapan niman yequitohua in Huitzilopochtli quilhuia inintoca teomamaque axollohua tlamacazqui, ihuan in Quauhtlequetzqui anozo Quauhcohuatl, quimilhuia notahuane namechnahuatia