Auh ynjn tlacuelehoatl ontoneoa onchichinaca in moiollotzin in monacaiotzin tlacuelehoatl ontlaiooatica in vncan ontlacauhteoac in vncan ocontlatolchiaia in totecujo tlacuele centlamjc xoconmomachiti in jcnopilotl quennel timotolinja nopiltze ma ixquich motlapal xicmochivili ma no cuele iuhqujn tlaocoli tocontolo ca çan nican achitzin ic ticchicauhtivitze in moiollotzin in monacaiotzin ca nican popovi ixtlavi in naniotl in taiotl ca otlanemiuhcantili in totecujo ca oiaque in monanoa in motaoa in vel quiteneoaia in vel qujpoaia inchoquizio in ixcaioiotlatolli auh ca ie ixqujch injc mitzmotlatlauhtilia yn monaoa in motaoa tle ticmatcatzintli