Auh inic ome cihuapiltin quimonan Chalco in Tlilpotoncatzin Cihuacohuatl in cihuapilli itoca Quauhtlamiyahualtzin oncan te ixpoch in A{c}xotlan cihuateopan initecpan chancatca in toteoci teuhctli, ± auh inin cihuapilli inihuan Tlilpotoncatzin cihuacohuatl oquichiuhque zanicel ointechquiz Cihuatzintli itoca Quetzalpetlatzin inin qui huallan quimocihuauhti in Dn¨ Thomas de Sn¨ Martin Quetzalmazatzin Chichimeca teuhctli tlatohuani Amaquemecan ompa tlacatito itoca Dn¨ Juan de Sto¨ Domingo de Mendoza Tlacayelleltzin Chichimeca teuhctli tlatohuani Amaquemecan.
7 tochtli xihuitl, 1486 años, ipan in momiquillico in tlacatl in Tizocicatzin tlatohuani catca Tenochtitlan inipiltzin huehue Tezozomoctli tlatocapilli Tenochtitlan in tlatocat chicuacen xihuitl in mellahuac in cequintin zan nauh xihuitl quitlallia inic tlatocat, auh in quincauhtia ipilhuan izquintinin initechquizque izcatqui in totoca in tlatocapipiltin in ye mochi matlactli omome.
Inic ce itoca Yaotzin, anozo Tepehuantzin tlacochcalcatl. ±
Inic ome itoca Amaquemetzin.
Inic ey itoca Tezcatlpopoca, ini oquichiuhtica in Dn¨ Diego de Sn¨ Francisco Tehuetzquititzin.
Inic nahui itoca Imactlahcuia Tlacateccatl, inin yaomic Atlixco.
Inic macuilli itoca Mauhcaxochitl huehue, inin oquichiuh in Da¨ Maria, quimonamicti in Dn¨ Diego Tehuetzquiti oncan otlacatque yeintin inpilhuan, inic ce itoca Tezcatlpopocatzin occe, inic ome itoca Dn¨ Pedro Mauhcaxochitl occe ichpochtzinin in ya Xochimilco, inic ey itoca Dn¨ Pablo Ixcuinatzin.
Auh zan niman ipanin in omoteneuh xihuitl in 7 tochtli in motlatocatlalli in tlacatl in Ahuitzotl tlatohuani Tenochtitlan, ipan cemilhui tlapohualli 10 tochtli, ic 15 de Abril ini zan no ipiltzin in huehue Tezozomoctli tlatocapilli Tenochtitlan inin iquimeixtin ipilhuan ± ye omito ye teyacapan in Tizocic tlatlacoyehua in Ahuitzotl, ihuan in Chialchiuhnenetzin [Chalchiuhnenetzin] icihuauh catca in Moquihuix tlatohuani Tlatilolco, auh za xocoyotl catca in Axayacatzin, auh ye achtopa yehuatl otlatocat in Tenochtitlan, zatepan initiachcahuan inyuh on mottac nican.
10 Tochtli xihuitl, 1502 años, ipan in momiquillico in tlacatl in Ahuitzotzin tlatohuani Tenochtitlan inipiltzin huehue Tezozomoctli tlatocapilli Tenochtitlan inimeixtinin nican omotocateneuhque tlatoque imeixtin ixhuiuhtzitzinhuan in tlacatl Itzcohuatzin tlatohuani Tenochtitlan, auh in quincauhtia ipilhuan Ahuitzotzin izquintinin initechquizque izcatqui inintotoca in tlatocapipiltin in yemochi.
Inic ce itoca Quauhtimoctzin tlatohuani Tenochtitlan yehuatlin incacico Españoles inipan ic 13 de Agosto inipan ilhuitzin ± Sn¨ Hypolito Martir inicaxihuaque inic poliuhque Mexica.
Inic ome itoca Atlixcatzin tlacateccatl.
Inic ey cihuatzintli amohuelmomati initoca inin cihuapilli, zace inantzin inehuan tlacatque in Atlixcatzin Tlacateccatl, in Coltzin, in huehue Cahualtzin ichpochtzin ininnantzin inicihuauh catca Ahuitzotzin inic oncan otlacatque in ye omoteneuh inichpoch Ahuitzotzin quimocihuahuati in tlacatl huey tlatohuani Moteuhczomatzin Xocoyotl, ic oncan otlacatque ointechquizque omentin inpilhuan; inic ce itoca Axayaca, inin zan telpoch mictiloc. Inic ome itoca Da¨ Isabel de Moteuhczoma imomextin ipilhuanin in Moteuhczomatzin Xocoyotl inyuhye on neciz.