41v 105

] ma xiqujmonnotztiuh injc contecujlizque in çacatzintli in pepetzintli ioan injc contetlalilizque inteicpaltzin in campa neceujloian ca tel ixqujch o in otiqujnmacaque in tihiio in totlatol in iuhquj in tlacaoapaoaia in quauhtlaca in çacatlaca in puchteca in jaque eta ca aocmo monequj in quexqujch timjtzcaqujtizque ca ça njcan achitzin ic timjtzonchicaoa ma iocuxca itlã xonmaqujlti in tlaihiioviliztli ma ixqujch motlâpaltzin tle ticmomachitia nopiltze in jquac otlatlauhtiloc njman no ic cen camatzintli ic tlacuepa ic tlananqujlia qujtoa Oannechmocnelilique in oceloqujchtle otlacauhquj in amoiollotzin ac nehoatl ac njnomati in njcan cen camatzintli njqujcnopilhuja yn amotechicaoaliztzin in amotenaniotzin amotetaiotzin ca nocontlapoa in amoxillantzinco amotozcatlantzinco actica in cepouhtoc in cepoatoc in cuelpachiuhtoc in iuhquj quetzalli in vel vitoliuhquj in vel iaque auh in iuhquj chalchiujtl in ololiuhquj in vel petlaoac in iuhquj teoxiujtl in tlamatilolli in uel cuecueioca aço cana namechonnotlaxililiz ca ic nonnapantiuh noxillan notozcatlan onactiuh noiollo itlan onietiuh in amonaiotzin in amotaiotzin in amono anqujmaxcaujlique Eta