137v 12

Huitzillopochtli ye quin huell otlipan quihuallantiquizque ynic quihualmomamaltique ynic yehuatl oquihualmoteotitiaque yn Azteca Mexitin ypampa yn ynic omeyollohua cequintin huehuetque yn iuh momati yn achto ca quimoneltoquitiaya y nelli Dios cemixquichyhuellitzin yn topampa momiquillitzino auh aço yuhqui acanoço mocamo huel mellahuac momati yn aço tlaneltocaya yniquac huallolinque yn ompa Aztlan auh ca çan in iuh mellahuac momati yeppa tlateotocani ynic motenehua Gentilesme auh ynin huey quahuitl yn inpan poztec yn iuh omito yn tlacpac yn ompa ypehuayan ynin amoxtli ca çan no yehuantin yn tlaaquil yn tlatocal yn Azteca auh in ixquich cahuiti ynin quahuitl ynic achto tlaaquilli yhuân ynic poztequico ontzon xiuhtica ypan matlacpohualxiuhtica ypan chicuexiuhtica Auh amo momati tle ytoca yn quahuitl