11v 24

] ma xicmonantili ma xicmotatili in quauhtli in ocelutl in cenquaujtl in cemjxtlaoatl mantiuh in qujmottitia in texcalli in atlauhtli in jmac maniz in quauhxicalli in quappiaztli in tlapotonjlli auh in mjtzmotlatotonjliz in qujtotonjz auh in qujtimaloz in chimalli in tlaviztli in tençacatl in tlalpilonj in nacochtli in cuecueiochtli in matemecatl in cotzeoatl in maxtlatl in tilmatli in quemjtl auh in qujtotonjz in jlviltiz in jmaceoaltiz in qujcnopilviz in qujmaceoaz in chalchiuhtli in teuxiujtl in quetzalli auh in teucujtlatl in motzmolinca in mocelica in motzopelica in maviaca in motechcopatzinco vitz in monacaiotzin auh in ie ixqujch in quauhtlj in ocelutl manoço achitzin qujcnopilvi ma achitzin itech matilivi in tiçatl in jvitl ma xicmottitili in tlamaviçolli macamo mavi in jiollo ma caujiacamati ma qujtzopelicamati in jtzimjqujliztli ma ica in jiollo cavilti in necoc tene in tlapotonjlli [ fol v