0 32

conan in Axayacatzin. Ic ome yuhqui itoca ± in Acolnahuacatl. Inic nahui itoca Matlatzincatl. Inic macuilli itoca Yopihuehuetl. Inic chicuacen itoca Macuilmalinal, inin Xochimilco tlatocatito in ipiltzin itoca Dn¨ Francisco de Guzman Omacatzin, inin yaomiquito Atlixco in Macuilmalinaltzin. Inic chicome itoca Coyoltzitzillin. Inic chicuey itoca Moteuhczoma Xocoyotl, tlatohuani Tenochtitlan, inin yehuatl ipan acico in Españoles, iniquac acico yehuatl tlatocati in nican Mexico. Inic chiuhnahui itoca Tecepatic yaomic Atlixco. Inic matlactli itoca Teyohualpachohua. Inic matlactli once itoca Cuetlahuatzin, inin ompa contlatocatlallica in Axayacatzin in Itztapallapan ipampa ininantzin ompa ± ichan ompa conitlanca in Axayacatzin in cihuapilli amo huel momati initoca inin ichpochtzin catca in huehue Cuitlahuatzin, zan no ompa tlatohuani catca in Itztapallapan ye omotocateneuh Tlacpac, ipiltzin Itzcohuatzin. Ipilhuan Axayacatzin inic ce Tezcatzin inin yaomiquito Huexotzinco. Inic ome Machimalle. Inic ey Tepehuatzin Tlacochcalcatl. Inic nahui Illamayehuatzin. Inic macuilli Quitziquaquatzin, yaomiquito Huexotzinco. Inic chicuacen Dn¨ Juan Achicatzin. Inic chicome itoca Ipampozontzin, inin tlatocatito Tenanyocan ompa quichihuato i Da¨ Ines. Inic matlactli omome inipilhuan Axayacatzin cihuatzintli itoca Matlallaxochtzin inin quihuallitlan quihuallan in Tozancoztli tlatohuani Tecamachalco, auh ompa otlacatito ompa ointechquiz initoca Acuechetzin tlatohuani Tecamachalco. ± Inic matlactli omey itoca Quiyautzin, auh in ocomentin amo momati intoca. Auh zan niman ipan in in omoteneuh in Ome Calli xihuitl 1481 años, ipan motlatocatlalli in tlacatl in Tizocicatzin tlatohuani Tenochtitlan, ipan cemilhui tlapohualli 6 Cozcaquauhtli, ic 2 de Junio, inin zan no ipiltin in yacapan in huehue Tezozomoctli tlatocapili Tenochtitlan, inin Tizocicatzin ye omito yetetiachcauh catca. 3 Calli xihuitl, 1469 años, ipan in tlacat in nican Mexico in miccacalcatl Tlaltetecuintzin inipiltzin Tlilpotoncatzin Cihuacohuatl, inyuh quitohua Tequanipan tlaca Chalca oyuh ye macuil xihuitl poliuhque inic pohualloque Chalca in tlacat Miccacalcatl Tlaltetecuintzin, yece inin amo yehuatl mottaz moneltiliz in xihuitl quin ye moneltiliz iniztlanica xihuitl, inipan otlacat impampa inipan in ± xihuitl omoteneuh yehuatl ipan motlatocatlalli in Axayacatzin in 3 calli xihuitl. 3 Acatl xihuitl 1483 años, yehuatl moneltillia inin xihuitl inipan tlacat in Miccacalcatl Tlaltetecuintzin inipiltzin Tlilpotoncatzin Cihuacohuatl inin tlatocapilli ompa ontlacihua an in Amaquemecan Chalco in oncan Tequanipan in ompa hualla Cihuapilli itoca Xiuhtoztzin inin ichpochtzin initoca Yaopahuintzin quauhtlatohuaya oncan in Tequanipan huixtoco, auh inoyuh hualla nican Tenochtitlan in Xiuhtoztzin niman quipilhuati in omotocateneuh Tlilpotoncatzin Cihuacoatl, oncan tlacat in Miccacalcatl Tlaltetecuitzin.