20r 162

] tenquatic iez in jconeuh Auh injc qujpaleviaia otztli ytztli ixillan contecaia qujl ic amo tenquaiviz in piltontli Amono vel qujquaquaz in chapuputli qujl ic amo motentzoponjz in piltontli in jquac otlacat Yoan amo vel iooal nenemiz qujl cenca chocanj iez in jconeuh no iuhquj in toqujchtin amono vel iooal nenemjz anoçe itla qujmonamjctiz aço mjmjqujz Auh injc amo iuh ipan muchiooaz otztli xaltetl anoço tleconextli ixillan qujtema anoço iztauhiatl Auh in toquichtin xaltetl anoço picietl iehica qujl no vncan qujcuj in qujtoa aiomama Auh injc neci aiomama ycujtlapanca iuhqujn posatontli iuhqujn texotic anoçe cuetzpaliciviztli Injc neci cuetzpalicivi piltontli ceceiooal in choca yoan yquexilco yciacac motlatlalia nacatotonti ololtotonti melactotonti Auh injc pati qujxoxotla qujqujqujxtia in nacatotonti Ioan in otztli in jquac aiamo vel tlacatl motlalia in jconeuh qujntlacaoaltiaia in jquac oalmomana metztli injc amo conacopaittazque qujmjlhujaia macamo xoconjttacan in metztli mjmjqujz anoçe tenquaiviz in amoconeuh