01 156

{f. 61r col. a} yn tlavitolli, tlacalvaztli, in telolomatlatl, ca muchi ytonal. Auh ca no iuhqui in cactly, in moteneva tecpilcactli in izquitlamantli cactli in cuetlaxcactli cuitlachcac cactly tlacuilolli cactli in cacamuliuhqui cactly yoan in cenca canavac cactli yvan in pupulcactli vecapa yoan i nacazminqui cactli yoan yn ocelocactli : ioan in tochomio cactli, yn izquican icac ye muchi, cactli tlaçotli muchi intonal catca. Auh ça no iuhqui in moteneva vllamaloni vlli, in collamaya tlachco in quezevatl in mayevatl in nelpiloni ca muchi intonal catca in tlatoque, y ye vllamazque niman ye muchichiva, niman ye conteca yn inquezevauh niman ye mvlpia niman ye mumayevatia : niman ye vllama in tlachco, inic mvteneva ynic ynchan, ynic quipia yn imaltepeuh, ynic mitoa yn intonal y ye mvchi yn vnca^ quitlanitoaya in tlaçotli chalchivitl in tlaçotli tilmatli in tlaçotli evatl ioa^ in cacavatl oyehoatl i inic mitoaya yn intonal in tlachtli in vlli inic mitoa yn inchan in intianquiz : o ca iuhquin i, ynic otlamanca inic oquipixque çemanavatl inic mitoa ynic tzintic inic peuh in çemanavatl ynic oquipixqz yn chichimeca {p. 228} in inchan, yn intlal. Auh inic oquipixque yn imaçeval, y novian : ynic otlapialoc, ynic otlapix yn mexicatl in acolhoa in tepanecatl, o ca ye ixquich ynic ontlamaca, inic onemoac, Auh yn oiuh mito yn tlacpac yn intonal in tlatoque ayac vel ytech açia y^ manel pilli yn amo oquichtli avel ytech açia çan iuhqui macevalli yc nemia, yn amv oquichtli ca ytonal in tlatoque. Auh inic tlamanca muteneva : tetectitica octacayutica machyotica, ynic mitoa tlilotoc tlapalotoc yn nemiliztli in amo oquichtli pilly ça navatiloya in tlein quicuiz in tlein ynechichiuh yez in queni nemiz